पाँचथरका पत्रकारका लागि सदरमुकाम फिदिममा तथ्यांक पत्रकारिता सम्बन्धी ३ दिने तालिम सम्पन्न भएको छ । 

जेठ ८ गतेदेखि १० गतेसम्म भएको तालिमका सहभागीलाई नेपाल इन्भेस्टिगेटिभ मल्टिमिडिया जर्नालिज्म नेटवर्क निमजिनका मकर श्रेष्ठ र सुफल काफ्लेले पत्रकारितामा तथ्यांकको महत्त्व, तथ्यांक संकलन, विश्लेषण र प्रस्तुतिकरणबारे प्रशिक्षण दिएका छन् । 

तालिममा सहभागी इवारा लि‍म्बुले यो तालिमबाट पत्रकारिता गर्न थप सहज हुने  बताइन । “हामी थप अभ्यास गर्छाैँ, तालिममा जे सिकेका छाैँ, हामी अभ्यास गर्नेछाैँ,” उनले भनिन्, “सिकेकाे सीपलाई मर्न दिदैनाैँ ।”  

तालिममा अर्का  सहभागी कमल घिमिरेले एक साताको तालिमलाई छाेटाे अविधमा सकिएकाले अर्काे वर्ष एडभान्स तालिम आवश्यक भएकाे बताए । उनले भने “अहिले त हामीले डेटाकाे पीजी वा नर्सरीकाे काेर्ष मात्रै पढ्याैँ ।”

रामचन्द्र तामाङले डेटाको विश्लेषण गर्दा खाेजी समाचारकाे एंगल पनि पत्ता लगाउन सहज हुने बताए । 

नेपाल पत्रकार महासंघ, पाँचथर शाखाका अध्यक्ष भीमकुमार बाँस्काेटाले पत्रकारकाे क्षमता विकासका लागि तालिममा  प्राविधिक सहयोग गरेकोमा निमजिनलाई धन्यवाद दिए । जिल्लाको पत्रकारहरूकाे माग अनुसार क्षमता थप अभिवृद्धि  गर्न महास‌ंघ तत्पर रहेकाे उनले बताए । 

नेपाल इन्भेस्टिगेटिभ मल्टिमिडिया जर्नालिज्म नेटवर्क (निमजिन)को प्राविधिक सहयोग रहेको यो तालिम नेपाल पत्रकार महासंघ पाँचथर शाखाले आयोजना गरेको थियो भने आर्थिक सहयोग कोशी प्रदेशको आन्तरिक मामिला तथा कानुन मन्त्रालयको थियो ।

निमजिनले तथ्यांक पत्रकारितासहित मल्टिमिडियाको प्रयोग, खोज पत्रकारिता, आर्टिफिसियल इन्टेलिजेन्स, जलवायु परिवर्तन, विपद्, मानव बेचबिखनलगायतका विषयमा पत्रकारहरूलाई तालिम, अभिमुखिकरणका साथै स्टोरी उत्पादनका लागि फेलोसिप पनि प्रदान गर्दै आएको छ ।  निमजिन पत्रकारहरूद्वारा स्थापित गैरनाफामुलक संस्था हो ।